Ukuhluleka kweKaizer Chiefs ukuvumelana neStellenbosch FC ngoFawaaz Basedien sekuyikhombe kumdlali weGolden Arrows, uBradley Cross(23), okuthiwa isithole imvume yokumsayinisa kuBafana Bes’thende.
UCross uzoba wumdlali wesithupha osayiniswe yiChiefs kubadlali okubalwa Kubo uBongani Sam olimale efike, Fiacre Ntwari, Rushwin Dortley, Gaston Sirino nomdlali wase-Angola u-Inacio Miguel.
Ngokombiko we-iDiski Times, iChiefs ne-Arrows bavumelene ngalo mdlali kodwa imali ezothengwa ngayo ayikaveli.
UCross uzoba wumdlali okahle esikwatini seChiefs kwazise unamava okudlala esigabeni esiphezulu kwiPSL futhi ubiziwe nakwiBafana Bafana ngoNovember nyakenye.
Lo mdlali uzobanga ijezi noSam uma esebuyile ekulimaleni ngokunjalo noHappy Mashiane.
IChiefs ibifisa ukusayinisa uBasedien kodwa iStellies kuthiwa ishaye phansi ngonyawo yathi akayi ndawo kwazise ibisivele idayise u-Iqraam Rayners noDeano van Rooyen. Kubikwa ukuthi incamele ukumkhuphulela umholo kunokuthi imdayise.