Umqeqeshi omusha weKaizer Chiefs u-Arthur Zwane usephinde washayelwa iphakethe kulandwa umdlali amfuna eqenjini lakhe ngesizini ezayo.

IChiefs neSekhukhune United bagcine befinyelele kwisivumelwano ngokudayiselana isethenjwa uYusuf Maart.

Lamaqembu asevumelene ngemali ebalelwa ku-R6 million. UMaart usevumile ukujoyina iGlamour Boys kanti nezimfuno zakhe angeke zilikhalise iqembu.

IChiefs neBabina Noko bebebambe izingxoxo ezinsukwini ezedlule mayelana nalomdlali oyibamba enkabeni yesisu. Lamaqembu agcine efikile kwisivumelwano ngemuva kwezingxoxo ezinde.

UMaart ubevele elikhalela ithuba lokujoyina iChiefs. Lomdlali ushaye into ecokeme ngesizini ephelile, wazifaka naseqenjini lesizwe. Ushaye amagoli amabili, wakhanda amanye amabili emidlalweni engu-28 ngesizini ka-2021/22.

UMaart uzojoyina kanye noZitha Kwinika, Ashley Du Preez, abasayiniswe kwiStellenbosch FC.