Oyisikhulu esiphezulu seCape Town Spurs u-Ari Efstathiou uthi iKaizer Chiefs ishaye ungqimphothwe yalaxaza izingxoxo ngo-Asanele Velebayi sekusele usuku kuvalwe iwindi lokuthenga abadlali.
NgoLwesine, abeSABC Sport babike ukuthi iGlamour Boys iyiqale phansi imizamo yokusayinisa uVelebayi njengoba besekusondele ukuvalwa kwewindi.
Izingxoxo phakathi kweSpurs neChiefs ngoVelebayi zidonse isikhathi eside, womabili amaqembu engahlangabezani eduze ngesivumelwano.
U-Efstathiou uthi iChiefs ibuyile ezingxoxweni ngoLwesine kodwa ayifunanga ukukhokha lemali ebifunwe yi-Urban Warriors.
“UVelebayi ubefunwa amaqembu amathathu kuleli, elinye belizinze phesheya kwezilwandle. Iqembu langaphandle alikaze likhulume into eqondile, bekungamahebezi kuphela.
“IKaizer Chiefs iyona kuphela eyabeka imali etafuleni ngesikhathi kuqhubeka izingxoxo ngenyanga edlule. Sachithwa isicelo sayo ngoba singeneme ngemali abayibeka. Alikho iqembu elalandela ngesicelo esibonakalayo emuva kwalokho.
“IChiefs ibuyile ezingxoxweni ngoMsombuluko kodwa ayikhulumanga ngemali. Sibachazelile ngemali ebesiyifuna, besizimisele ngokuyihlangabeza eduze. Basitshele ukuthi bazobuya nempendulo kodwa abakaze besabuya,” kusho u-Efstathiou ekhuluma nabeDiski Times.
U-Efstathiou uthi izingxoxo zibhuntshe ngoLwesine, wabeka ukuthi iChiefs ayikaze isinonge isicelo sayo.
“Izingxoxo ziqale phansi ngoLwesine sixhumana ngezingcingo kodwa akuhambanga kahle ngoba besihlukene phakathi ngemali.
“Ngizobalula ukuthi sibadayisile abadlali abathathu, omunye usayine nayo iChiefs, ababili baya kwiStellenbosch. Asikaze sinqabe ukuhwebelana neChiefs. Iqembu linelungelo lokubeka imali eliyifunayo ngomdlali.
“Inkinga yaqala ngesikhathi kuputshuzwa ukuthi kunezingxoxo ezikhona neChiefs. Ngikholwa ukuthi ibizogcina ilungile indaba kaVelebayi ukube ayiputshuzwanga indaba yakhe,” kusho u-Efstathiou.