I-Orlando Pirates ikhuphukele esicongweni seBetway Premiership ishaya iSuperSport United ngo 2-0 e-Orlando Stadium ngoLwesibili ebusuku.
IPirates ikore zisuka kulo mdlalo u-Evidence Makgopa evalela igoli elihle ngomzuzu wesibili, elesibili livalelwe wuDean Hotto esikhathini esengeziwe. IPirates yenze eyagcina ukukwenza ngesizini ka-2002/2003 ngokunqoba imidlalo emine yokuqala kwisizini. Ngaleyo sizini yagcina inqobe isicoco seligi.
Umbiko womdlalo:
UMakgopa kusale kancane ashaye elesibili ngemuva kwemizuzwa kodwa ibhola lakhe ladlula eceleni kwepali. NoMofokeng kusale kancane ngomzuzu ka-10 ngemuva kwebhola elihle elifakwe wuMohau Nkota (19) obekungokoqala eqala umdlalo kwiBucs.
Ibivutha ingabaselwe emizuzwini engu-15 kuqale umdlalo iBucs ibonakala ukuthi ifuna ukulungisa indaba yesibhaxu esithole kwiMagesi FC koweCarling Cup ngempelasonto. Iqhubekile nokwakha amathuba esiwombeni sokuqala kodwa yahluleka ukuthola igoli lesibili.
ISuperSport ize yathola ithuba lokuzwa uSipho Chaine ngomzuzu ka-24 uLyle Lakay eshaya ifree kick ngemuva kokudlaliswa kabi kukaVincent Pule ngasebhokisini. Ngomzuzu ka-25 aphinde abuya Amatsatsanta ngebhola elihle elithole ikhanda likaPule ebhokisini elivinjwe wuChaine, uMorris wakora ekwi-offside.
Orlando Pirates XI: Chaine, van Rooyen, Sesane, Sibisi, Hotto, Mbatha, Makhaula, Nkota, Maswanganyi, Mofokeng, Makgopa.
SuperSport UnIted XI: Goss, Mobbie, Rapoo, Sanoka, Hlatshwayo, Ndlovu, Pule, Poggenpoel, Morris, Dzvukamanja, Lakay.
Okunye okuqaphelekile esiwombeni sokuqala ukuvuka emaqandeni kukaPatrick ‘Tito’ Maswanganyi obehlanganisa iminyakazo eduze nebhokisi.
IPirates iphinde yabuya ngomunye umnyakazo omuhle ngomzuzu ka-34 uNkota eqhubeka nokudalela udonga lweSuperSport izinkinga kwesokudla. Umnyakazo ugcine umoshwe wuMakgopa obekumele alishiyele uMofokeng obesendaweni engcono.
Nasesiwombeni sesibili Ezimnyama ziqhubekile nokufuna igoli lesibili. UNkota uthole ithuba elihle ebhokisini kodwa wavele washaya ibhola uphezu kwamapali.
Elinye ithuba leBucs lize laqhamuka ngomzuzu ka-71 uMaela, ongene endaweni kaNkota, eshaya ngekhanda ibhola ebelifakwe ebhokisini kodwa walivimba kalula uGoss.
UMofokeng naye uyeke ithuba elihle ebhokisini eqede ngonozinti kodwa wahluleka ukubeka ibhola enethini ngomzuzu ka-83.
Abadlali beBucs kuzofanele bazinuke amakhwapha ngenqwaba yamathuba abahluleke ukuwasebenzisa kulo mdlalo obungaphela nge-score esingcono kuno 1-0.
IBucs, eshiya iSundowns ngamaphuzu amathathu esicongweni ngeke isithole isikhathi esitheni sokuphumula njengoba izobhekana naMaZulu FC ngoLwesihlanu e-Orlando Stadium.
Ukushaywa kweSuperSport kuyishiye kunombolo 13 kwilog, okuzomkhathaza uGavin Hunt ngaphambi kokubhekana neKaizer Chiefs ngoMgqibelo.