I-Orlando Pirates isivule izingxoxo nesitobha sase-Iraq uMustafa Nadhim.
Imibiko ebhungwa e-Iraq iveza ukuthi iBucs igaqele uNadhim (28) odlalela i-Al Najma yaseBahrain. UNadhim uyibamba odongeni lwasemuva.
UNadhim unemidlalo engu-29 eqenjini lesizwe lase-Iraq. Usedlale emaqenjini angu-9 empilweni yakhe.
Iziko labezindaba i-IraqProPlayers liveza ukuthi uNadhim ufunwa amanye amaqembu ase-Iraq.
“Isitobha uMustafa Nadhim ufunwa iqembu laseNingizimu Afrika i-Orlando Pirates. Lomdlali ufunwa amanye amaqembu ase-Iraq, iBucs isiqale izingxoxo naye umdlali. UNadhim uzowabheka wonke amaqembu amfunayo, akhethe alithandayo,” kubhalwe esitatimendeni esikhishwe ezinkundleni zokuxhumana.
IBucs idedele izitobha ezine uKwanda Mngonyama, Justice Chabalala, Ntsikelelo Nyauza noThulani Hlatshwayo. Isayinise izitobha ezimbili eThekwini okunguTapelo Xoki noNkosinathi Sibisi.