Sigcine singafezekanga isifiso sikamqeqeshi oyibamba kwiRichards Bay FC uVusumuzi ‘Kanu’ Vilakazi owayekade ecele ukusayinelwa abadlali abanesipiliyoni sePSL abazokwazi ukusiza iqembu empini yezembe.
Lize lavalwa iwindi lokuhwebelana ngabadlali engekho umdlalo onohlonze osesayiniswe yileliqembu. Kunalokho, iBay yenze obekungalindelwe ikhuphula abadlali abane eqenjini leDstv Diski Challenge.
AmaRich Boys akhuphule uNtlonelo Bomelo, Thandoluhle Gazu, Siphesihle Buthelezi noSanele Zulu, abashaye into ecokeme kwiDiski Challenge kulesizini. Bonke labadlali bagixabezwe ngenkontileka yeminyaka emihlanu umdlali eyedwa.
“Sibafisela izilokotho ezinhle”, kubhalwa esitatimendeni seqembu.
Labadlali abakhushuliwe bazofica uzakwabo uNkosinathi Ndaba eqenjini elikhulu. UNdaba, oyibamba emuva, ukhushulwe phakathi nesizini.
IBay isengcupheni yokugawulwa yizembe njengoba ihleli kunombolo 15 kwiDSTV Premiership. Leliqembu seliqoqe amaphuzu angu-13 emidlalweni engu-16.
Ngaphambi kokuvalwa kwesizini ngenxa ye-AFCON, uVilakazi wadalula kwabezindaba ukuthi iqembu lishoda ngabadlali abanesipiliyoni ukuze lizokwazi ukuvika izembe. IBay igcine isayinise umgadli waseMalawi uKhuda Muyaba kuphela. UMuyaba, oseke wadlalela iPolokwane City, usayine inkontileka ezonqamuka uma kuphela isizini.
AmaRich Boys azovula isizini ngomdlalo weligi neRise and Shine ngomhlaka 14 February. Leliqembu lisanqobe imidlalo emithathu kuphela kwiDSTV Premiership.