Iqembu eliphekwa wuMikel Arteta, i-Arsenal, selihleli ngesinqe esisodwa esicongweni sePremier League kulandela ukulahla amaphuzu emdllalweni wangempelasonto.
I-Arsenal ibanjwe yiBrentford ngo 1-1 e-Emirates Stadium ngoMgqibelo ntambama. Abalandeli bayo bebelindele amaphuzu aphelele kwazise ngempelasonto edlule yashaywa yi-Everton ngo 1-0. Imphumela yakamuva isinciphise igebe lamaphuzu phakathi kwayo neManchester City ekunombolo 2 kulandela ukushaya i-Aston Villa ngo 3-1 ngeSonto.
Elinye iqembu elizotatazelisa iGunners iManchester United, esisele ngamaphuzu amahlanu kuphela nakuba ihamba phambili ngemidlalo emibili.
Okuzokhatha u-Arteta wukuthi kuleli sonto i-Arsenal izobhekana nompetha iManchester City, bese ilandela nge-Aston Villa neLeicester City ekuhambeni, ngaphambi kokudlala ne-Everton ekhaya. Imidlalo engeke ibelula neze. I-Arsenal isamelwe wumqansa wokubhekana neLiverpool, Man City neChelsea ngo-April, okusho ukuthi sekumele isebenze ngokuzikhandla ukuqinisekisa ukuthi ayiwalahli amanye amaphuzu ngaphambi kwaleyo mdlalo engase ihambe namanye amaphuzu.