Umqeqeshi weLiverpool uJurgen Klopp uthi ubengafuni ukuhlambalaza iBournemouth abayinenebule ngo 9-0 emdlalweni wePremier League ngoMgqibelo.
UKlopp ubefakele ezakhe ingcindezi yokubuyisa izinduku njengoba zishaywe iManchester United ngo 2-1 ngoMsombuluko.
ILiverpool ishaye amagoli amahlanu esiwombeni sokuqala, yabuya namagoli amane sekubuywa ekhefini. Abadlali abayisithupha bashaye amagoli.
“Sishaye amagoli amahle. Siqhubekele nokushaya amagoli yize umdlalo ubusucacile. Bengifuna siqhubeke nomgqigqo wethu. Bengingafuni sihlambalaze iBournemouth ngoba ngiyayihlonipha. Besifuna ukufakela iBournemouth ingcindezi.
Bengifuna ukufaka abadlali abasebancane, bafanelwe ukudlala nabo. UHarvey (Elliott) ungumdlali osezingeni, ushaye igoli elihle. Ngijabule ngakho konke,” kubeka uKlopp ekhuluma nabeSky Sports.
Lomphumela ushiye iLiverpool kunombolo 8 kwiPremier League ngamaphuzu amahlanu.
ILiverpool izobhekana neNewcastle United emdlalweni weligi ngoLwesithathu. INewcastle ayiyazi induku selokhu kuqale isizini.
“Kubalulekile ukudlala ibhola enkundleni, kuzoshuba ngoLwesithathu. Isimo sezulu besisihle, nebhola belilihle. Akujwayelekile ukwenzeka lokho kwiLiverpool.
Angeke sisaphendula ngodaba lokuhluleka ukuwina. Usuku beluluhle kakhulu, angeke siphaphe.
Kufanele siqhubeke nomgqigqo omuhle uma sifuna ukuqhubekela phambili kwiligi. Kufanele siqinise manje. Sizoyibukela iNewcastle kusasa, sibheke izindawo ezibuthaka kuyona,” kubeka lomqeqeshi.