Usephinde wathola nesibhaxu umsubathi weMMA waseNew Zealand naseNigeria, u-Israel Adesanya, kwi-middleweight ye-Ultimate Fighting Championship (UFC) ephucwa ibhande wuSean Strickland obekulindeleke ukuthi amkeqe.

U-Adesanya uxhimfwe zisuka kwi-round yokuqala, wabuya kweyesibili nakweyesithathu, kodwa kuma-round amabili okugcina ubezenzela kuye uStrickland obelwa phambi komkhaya bakhe e-Australia. Okuqaphelekile kule mpi wukuthi uStrickland, obizwa ngoTarzan, ubesebenzisa amaqhinga acishe afane naka-Adesanya, abizwa nge-counter strike, ukuvika bese uyanemba. Bamshaye kanjalo waze wayophela umdlalo, wanqoba nge-unanimous decision.

Ekhuluma nabezindaba ngemuva kwempi unqabile ukukhuluma kakhulu wathi ucela ukuyodla isidlo sasekuseni, abe nomndeni wakhe nabantu abamthandayo njengamanje, washiya ezandleni zophethe ezokuxhumana eqenjini lakhe.

U-Adesanya usazolithola ithuba lokubuyisa ibhande lakhe kwi-rematch kodwa abaningi bafuna aqale abhekane nentaba yaseMzansi, uDricus Du Plessis kuqala; ozowina phakathi kwabo abhekana nompetha omusha.

NoDricus ngemuva kwempi uveze ukumangala ngalo mphumela njengoba abaningi bebelindele ukuthi azinqobele kalula u-Izzy.

Bekungokwesibili ephucwa ibhande ezimpini ezintathu.