UMengameli we-European Super League uFlorentino Perez, ophinde abe ngumengameli weReal Madrid, ushaya phansi ngonyawo uthi abajiki esinqumweni sabo sokusungula umqhudelwano omusha webhola lase-Europe.
Ekhuluma ohlelweni lwethelevishini eSpain uPerez uthe iSuper League izoqhubeka ngaphandle kweBayern, Dortmund nePSG abasazithela ngabandayo ngalo mqhudelwano. Njengamanje amaqembu ase-England ((Manchester United, Manchester City, Liverpool, Chelsea,Arsenal, Tottenham Hotspur), amathathu ase-Italy (Juventus, Inter Milan, AC Milan), namanye amathathu ase-Spain (Barcelona, Real Madrid, Athletico Madrid onke asesayine izinkontileka neSuper League.
Isimemezelo ngalo mqhudelwano ngempelasonto sisuse umsindo kubalandeli bebhola ngokunjalo nakwinhlangano eyengamele ibhola e-Europe i-UEFA, iFIFA kanye nezinhlangano ezengamele amaligi emazweni ase-Europe. Lezi zinhlangano zisabisa ngokuwakhipha emqhudelwaneni yamaligi asekhaya amaqembu asekhethe ukungena kwiSuper League ngokunjalo nakwi-UEFA Champions League nakwi-Europa League.
Impendulo ye-EUFA ephelele:
UEFA, the English Football Association, the Premier League, the Royal Spanish Football Federation (RFEF), LaLiga, the Italian Football Federation (FIGC) and Lega Serie A have today released a statement.
— UEFA (@UEFA) April 18, 2021
Read it in full here: 👇
UPerez uthe akusizi ukusatshiswa kwabo ngoba bahlabela phambili nezinhlelo zabo ngoba amaqembu aselahlekelwe imali eningi eminyakeni edlule ngenxa yokungabibikho kwezinguquko ebholeni.
“Kunamaqembu amaningi abalulekile eSpain, Italy nase-UK afuna isixazululo kulesi simo esibi semali esizithola sikuso. Indlela yokulungisa leyonto ukwandisa imidlalao eshubile phakathi nesonto. Kunokuthi kudlalwe kwiChampions League kuphela, iSuper League izolekelela amaqembu enze imali ayilahlekelwe (ngesikhathi sobhubhane lwe-Covid-19),” kuchaza uPerez.
UPerez wenze isibonelo ngeReal Madrid wathi sebelahlekelwa yizindodla zemali kule sizini nakwisizini edlule. Lokhu kuholele ekutheni zehliselwe umholo izikhulu zeMadrid kanti nabadlali sebeke bacelwa ukuthi bahole imali engaphelele.
“Ibhola kumele luqhubekele phambili, kumele lihambisane nezikhathi esiphila kuzo. Njengamanje ibhola lilahlekelwa abalandeli, imali etholwa kuthelevishini iyancipha.Sekunesikhathi sifuna ukwenza iSuper League, ubhubhane lusinikeze ithuba lokuyenza ngokushesha ngoba izinto zimapeketwane ebholeni njengamanje,” kusho uPerez.Â
Uqhube wagcizelela ukuthi iSuper League umqhudelwano osungulelwe ukuhlenga ibhola futhi izowaqinisa namaqembu amancane. Lo mqhudelwano kuphakanyiswa ukuthi ube namaqembu awu-20, angu-15 awo amaqembu abasunguli beSuper League okusho ukuthi ayohlale ekhona kuwo wonke amasizini, bese kushiywa izikhala ezinhlanu zamaqembu azohlungela ukungena.
Ngokwemibiko iSuper League ingase iqale ngesizini ezayo ngo-Agasti noma ngoSepthemba.