Baphume kuvela elomhlathi enkundleni abalandeli beTottenham kulandela ukushaywa yiMan City ngo 2-0 okuwumphumela osuse izitha zabo esicongweni.
Abalandeli beSpurs babonakale beshaya icelebration yeMan City iPoznan kulandela ukungena kwegoli lokuqala esiwombeni sesibili, elivalelwe wu-Erling Haaland.
IMan City ibidinga ukuwina ukuze izobuyela esicongweni sePremier League njengoba isembangweni oshubile ne-Arsenal. Isihamba phambili ngamaphuzu amabili manje, kusele umdlalo owodwa.
Ngaphambi komdlalo abalandeli beTottenham abakufihlanga ukuthi bafisa ukubona iqembu labo lidliwa ukuze i-Arsenal izogeja isicoco seligi.
Tottenham fans sat on the hate business for real 😂😂😂 pic.twitter.com/B11s48j39z
— Chidi Okereke (@Chydee) May 14, 2024
Ukujabula kwabalandeli beSpurs kucasule umqeqeshi weqembu u-Ange Postecoglou, othe uma esekhuluma nabezindaba waveza ukuthi kuningi abadinga ukukulungisa ukuze babe yiqembu elisezingeni eliphezulu.
“Ngicabanga ukuthi izinsuku ezimbili ezedlule zikubeke obala ukuthi isisekelo seqembu sintekenteke. Kuningi engikuqaphile. Akukho okunye engizokusho, kodwa nani ningazihlaziyela nibeke imibono yenu ngokwenzekile,” usho kanje.
“Mhlawumbe ngibe nephutha ngezinto ebengizitshela ukuthi zenza iqembu libe sezingeni eliphezulu, kodwa kulungile. Ngizele ukuzowina la, ngizele ukuzophumelela.
“Anginendaba nezifiso zabanye abantu. Ngeke kodwa ngitshele abantu ukuthi bazizwe kanjani ngezimo ezithile, kodwa into ebisinqobisa imidlalo emasontweni edlule ukwesekwa abalandeli uma sidlala ekhaya.