Umqeqeshi weKaizer Chiefs u-Arthur Zwane usole ezakhe ngokuba buthuntu phambi kwamapali njengoba zihluleke ukubhakuzisa inethi zibhekene naMaZulu izolo ebusuku.
IChiefs noSuthu bacazelane amaphuzu eMoses Mabhida Stadium, kungekho nelilodwa iqembu elishaye igoli.
Lomphumela uhlehlise iGlamour Boys kwiDSTV Premiership, yehlela kunombolo 11 ezansi ngemuva kwemidlalo eyisikhombisa.
UZwane uthi bekufanele benze kangcono ngamathuba abawatholile.
“Sihlulekile ukuqinisa emapalini. Siwakhandile amathuba kodwa sihlulekile ukuwasebenzisa.
Siqale ngegiya eliphansi, besizokwazi ukushaya igoli ukube sibafake ngaphansi kwengcindezi umdlalo usaqala. USekgota, uKhama no-Ash (Du Preez) bekufanele bashayele ipali.
Sibavulele izikhala, sabanikeza nesikhathi ebholeni. Besilindele ukuthi bafake ibhola eduzane nezitobha zethu, bezama ukuthola abagadli abathathu,” kubeka uZwane ecashunwa abeSuperSport TV.
UZwane uncome umsebenzi wezitobha ezisebenze kanzima zivala abagadli abathathu boSuthu.
“Sikwazile ukuvala abagadli bezitha kodwa bebezithola izikhala zokudlala ibhola ngokusondelana. Bekufanele sizame ukuvala izikhala ngokushesha.
Ngibona sengathi bekufanele sinqobe kulomdlalo kodwa sihlulekile ukusebenzisa amathuba esiwatholile,” kubeka uZwane.