Umqeqeshi weKaizer Chiefs u-Arthur Zwane useshayele ihlombe abadlali bakhe ngokunqoba kwiRichards Bay yize kuphele imizuzu engaphezulu kuka-60 bedlala bengaphelele ngemuva kokukhishwa kukaYusuf Maart ngekhadi elibomvu esiwombeni sokuqala.
IChiefs ishaye iNatal Rich Boys ngo 1-0 eMoses Mabhida Stadium izolo ebusuku. Igoli leGlamour Boys lishaywe uDillan Solomons, okube yiphenathi ayishaye esiwombeni sesibili.
“Bengilindele ukuthi sithwale kanzima njengoba besishoda ngomdlali oyedwa umdlalo wonke. Besidlala kahle esiwombeni sokuqala kodwa sazenzela phansi ngokuyeka ukushaya amagoli, lokho kunikeze izimbangi ithemba.
Okungijabulisayo ukuthi sikwazile ukugcina indlela yokudlala yize besishoda ngomdlalo owodwa. Siqhubekele nokudlala, sagcina kahle ibhola,” kubeka uZwane ecashunwa abeSuperSport TV.
IChiefs inyukele kunombolo 8 kwiligi ngemuva kokunqoba kwiBay.
UZwane uchaze ngesinqumo sokukhipha uNkosingiphile Ngcobo esiwombeni sesibili.
“Bekufanele senze izinguquko, uMshini bekufanele agijime indawo enkulu, yena ungumdlali okhanda amathuba. Bekuphoqa ukuthi sifake uNjabulo (Blom) ukuze kuzoqina esiswini. Sikwazile ukuthi sidedele uSekgota, Keagan noKhama, lokho kusisebenzele,” kubeka lomqeqeshi.
IChiefs izobhekana neCape Town City emdlalweni weDSTV Premiership olandelayo.