Umqeqeshi weFC Barcelona, uXavi, usegcine ememezele ukuthi uyashiya uma kuphela isizini ngenxa yokungahambi kahle kwezinto kuleli qembu elivithizwe yiVillareal ngoMgqibelo.
IBarcelona idliwe ngo 5-3 uXavi wamemezela ukuthi uyahamba uma kuphela isizini ngemuva komdlalo.
Lo mqeqeshi uthi usekwenze konke okusemandleni ukuqinisekisa impumelelo yeqembu.
“Ngicabanga ukuthi iqembu lidinga ukwenza izinguquko. Ngicabanga ukuthi bazokhululeka nabadlali. Kunokungezwano okukhona njengamanje.
“Ukuze nabaphathi beqembu bakhululeke, kungcono ngishiye. Ngisazokwenza konke okusemandleni ukuqinisekisa ukuthi iqembu lidlala kangcono.”
IBarcelona isele ngamaphuzu ayishumi kwiReal Madrid esesicongweni. Okunye okucasula abalandeli wukuthi ingemuva kweGirona ekunombolo 2 futhi okubukeka kuyiyo ezobangisana neMadrid isicoco seligi.