Umqeqeshi waMaZulu uBrandon Truter uthi uzibonele ngawakhe ukuthi akekho oneme ngomphumela wayizolo wokushaywa kwaMaZulu ebhekene neRichards Bay FC eMoses Mabhida stadium izolo.
USuthu ludliwa ngo 1-0 usuyophela umdlalo umkhonto ugwaza ekhaya kulandela ibhola elifuqwe lashaya ipali labuya lashaya unozinti uVeli Mothwa langena phakathi.
Leli goli lingene kulandela ukumiswa komdlalo imizuzu ewu-15 ngenxa yokubanika kwezulu eduzane nenkundla.
Ekhuluma nezintatheli ngemuva komdlalo uTruter ukuvumile ukuthi usengaphansi kwengcindezi ngenxa yemiphunela engagculisi. Uthe akayithandanga indlela okungene ngayo igoli leBay.
“Sikwazile ukuvimba ibhola lokuqala, elisibili elibuyiswe ebhokisini abadlali bavele babuka nje. Balisebenzisile ke lelo thuba bakora. Ukungena kwegoli sekuyophela umdlalo akukho kuhle. Angeneme ngomphumela. Ngibonile nokuthi akubajabulisanga abalandeli ngokunjalo nabaphathi beqembu,” usho kanje.
UTruter uthe lo mphumela usumfake ngaphansi kwengcindezi. Sekudlule imidlalo emihlanu Usuthu lungayazi i-win kwiDStv Premiership.
AmaZulu azobhekana ne-Orlando Pirates ngo-October 14.