Umqeqeshi weRichards Bay uBrandon Truter uzifake zonke enyameni kubadlali bakhe ekhala ngezinqumo ezishaqisayo abazithathe beginqwa yiKaizer Chiefs ebingaphelele koweBetway Premiership eNew Peter Mokaba Stadium, ngoLwesithathu.
Kuyiwe ekhefini iNatal RichBoyz ilandela ngemuva ngegoli elilodwa elishaywe uWandile Duba.
IBay ithole upotsho wokubuya emdlalweni ngesiwombe sesibili sekukhishwe uReeve Frosler ngekhadi elibomvu ngomzuzu ka-48.
Kunalokho Amakhosi yiwona athole igoli lesibili elishaywe u-Ashley Du Preez ngomzuzu ka-68, elokubika lezihambeli lavalelwa uYanela Mbuthuma esikhathini esengezwe unompempe.
UTruter ukhaliswe yizinqumo zabadlali ezishaqisayo, wayibeka obala eyokuthi kunezinto ezihlalele ukwenziwa umdlali uqobo.
“Amagoli asingenele namuhla ayangimangaza. Elokuqala kube yibhola ebeligotshiwe laqathakela kumdlali weChiefs, elesibili izitobha zethu zihuqe ubuthongo ziyeka abagadli abathathu bezitha,” kusho uTruter ekhuluma nabeSuperSport TV.
“Kunezinto ezingamdingi umqeqeshi, konke kusuke kusemahlombe omdlali. Isinqumo siphuma kuyena uqobo umdlali. Namuhla sidliswe yizinqumo zabadlali nokuhuqa kwabo ubuthongo.
“Ezinye izinqumo bezishaqisa namuhla ekubeni besinesikhathi sonke siphethe ibhola. IChiefs ibishoda ngomdlali oyedwa. Ibhola besilixosha, sijahe nokuthatha izinqumo,” kubalisa uTruter.
Lomqeqeshi uthi bazobuyela emuva beyolungisa izindawo ezimoshakele ngaphambi komdlalo olandelayo.
“Kucacile ukuthi sidinga ukulungisa indaba yezinqumo nobuhlakani uma siphethe ibhola. Izinga lethu beliphansi kakhulu, sishayeke lapho namuhla.
“Sizobuyela emuva siyolungisa, angeke sizithambise. Kunomdlalo olandelayo ezinsukwini ezintathu, sizobuyela ekhaya kusasa, siyophumula. Lomphumela sizowudlulisa ngokushesha noma ngiphoxekile ngabadlali abathize,” kubeka uTruter.