Yize isiqala ukushisa insimbi kwiCape Town City ebhinjelwa imiphumela, umqeqeshi u-Eric Tinkler uthi angeke bazifakele ingcindezi yokunqoba umdlalo weDSTV Premiership neKaizer Chiefs namuhla.
ICity ebambe amabhuleki emsileni weligi izobhekana neChiefs namuhla ebusuku.
ICity eqede endaweni yesibili ngesizini edlule, iqale ngebatha kwiligi kulesizini, yathola amaphuzu amabili kuphela emidlalweni emihlanu.
Nodonga luyavuza njengoba seludedele amagoli angu-8.
UTinkler uthi bafuna ukunqoba kwiChiefs kodwa kafuni ukufakela abadlali ingcindezi.
“Kuyaphoqa ukuthi sinqobe. Yize seziqalile izinkulumo, iligi isanda kuqala. Kuzoshintsha izinto eziningi kwiligi uma siwina imidlalo emibili kuphela. Angifuni ukutatazela, angeke ngifake le abadlali bami ingcindezi.
Sifuna ukubuya nomphumela ogculisayo kwiChiefs, okungamaphuzu amathathu. Kodwa ukuzifakela ingcindezi umdlalo ungakaqali yikhona okudala ukuthi sihluleke,” kubeka uTinkler.
ICity izokwamukela uThabo Nodada obelimele iqakala, waphuthelwa umdlalo ophele zibambene bebhekene neStellenbosch FC ngempelasonto.
IChiefs izodlala ngaphandle kukaYusuf Maart okhishwe ngekhadi elibomvu emdlalweni odlule beshaya iRichards Bay ngo 1-0. Indawo kaMaart kungenzeka ithathwe uNjabulo Blom.