Usesulile esikhundleni sokuqeqesha iTunisia uJalel Kadri ohlulwe ukufaka iqembu kwi-last 16 ye-Africa Cup of Nations (AFCON).
ITunisia idlale ngokulingana ibhekene neBafana Bafana, okuwumphumela oshabalalise amathemba okudlulela kwi-last 16.
ICarthage Eagles, eqede isemsileni kuGroup E, ibidinga amaphuzu amathathu ukuze izodlulela kweyomkhumulajezi. Leliqembu lizobuyela ekhaya liqoqe amaphuzu amabili kuphela e-Ivory Coast.
Ekhuluma esithangamini nabezindaba, uKadri uqale ngokuveza ukuthi unenkontileka neTunisia, futhi usazoxoxisana nezikhulu zeqembu.
“Siyaxolisa kubantu baseTunisia, siyazithoba. Kuyenzeka kubhimbe imiphumela ebholeni. Besibhekene nebhadi kulomdlalo weBafana.
“Ngiwuphendulile lombuzo ngaphambilini, nginenkontileka neqembu. Isinqumo sizothathwa njengoba sekuphele i-AFCON,” kuchaza uKadri ngemuva komdlalo.
NgoLwesine ekuseni uKadri uqinisekise izindaba zokwesula esikhundleni, uthi kube yisinqumo sakhe ukushiya umsebenzi ngemuva komdlalo neNingizimu Afrika.