Inkakha yeBrazil neFC Barcelona, uRonaldinho, ithi ngeke izihluphe ngokubuka imidlalo yeSeleção kwiCopa América ezoqala ngoLwesihlanu ngesonto elizayo ngenxa yesikwati esigcwele abadlali ‘abangekho ezingeni elifanele’.
URonaldinho (44) uveze lokhu ekhasini lakhe kwi-Instagram ngoMgqibelo ntambama ekhalaza ngesikwati esihlanganiswe wuDorival Júnior, ongaphansi kwengcindezi ngaphambi kwalo mqhudelwano.
Ebeka uRonaldinho uthe sekunzima ukubuka imidlalo yeBrazil.
“Sekwanele. Lesi yisikhathi esidabukisayo kulabo abathanda ibhola laseBrazil,” kubhala yena.
“Kunzima ukuthola umdlandla wokubuka imidlalo. Eminyakeni edlule asikaze sibe neqembu elibheda kanje. Alinabo abaholi abahloniphekile, kugcwele abadlali abantukuntuku.
“Ngiqale ukubuka ibhola kusukela ngisayingane, ngingakaqali ngisho ukulidlala. Angikaze ngisibone isimo esibi kanje. Abadlali angibaboni belwela ijezi. Angiliboni nebhola abalidlalayo.
“Ngizophinde ngisho futhi, indlela esidlala ngayo ayikaze ibheda kanje selokhe ngaqala ukubuka ibhola. Kuyihlazo. Ngakho ke ngiyesula. Ngeke ngiyibuke iCOPA America. Ngeke ngijabule ngisho siwina.”
URonaldinho ukhala nje iBrazil ibambane ngo 1-1 ne USA kumdlalo wokugcina wokulungiselela lo mqhudelwano. Emdlalweni eyisithupha edlule inqobe emibili kuphela.
Isikwati seBrazil kwiCopa America:
Goalkeepers: Alisson, Bento, Ederson
Defenders: Beraldo, Eder Militao, Gabriel Magalhaes, Marquinhos, Danilo, Yan Couto, Guilherme Arana, Wendell
Midfielders: Andreas Pereira, Bruno Guimaraes, Douglas Luiz, Joao Gomez, Lucas Paqueta
Forwards: Endrick, Evanilson, Gabriel Martinelli, Raphinha, Rodrygo, Savinho, Vinicius Jr.