Umqeqeshi we-Orlando Pirates uJose Riveiro ukhala ngenqwaba yamagoli ayekwe ezakhe zibhekene nompushana iCrystal Lake koweNedbank Cup yize benqobe ngo 6-0 kulomdlalo obubanjelwe eMbombela Stadium.
IBucs ishaye amagoli amane esiwombeni sokuqala izicanasela kwiLake FC egijima esigabeni seHollywoodbets Regional League eMpumalanga.
UTapelo Xoki ushaye amagoli amabili, amanye avalelwa u-Olisah Ndah, Relebohile Mofokeng, Patrick Maswanganyi noTshegofatso Mabasa.
URiveiro ukhale ngamagoli ayekwe yiBucs yize ikhande amathuba angu-20. Lomqeqeshi uthe akusenani ngoba sebedlulele emzuliswaneni olandelayo.
“Bekubonakala ukuthi mkhulu umehluko. Ngijabule ngendlela esiqale ngayo, asibanikezanga izikhala zokudlala, okuyinto ejwayele ukwenzeka kulemidlalo.
Besihleleke ngendlela, sangangenelwa yigoli. Bekufanele sishaye amanye amagoli. Angeke ngiyinake indaba yamagoli ngoba sidlulele emzuliswaneni olandelayo,” kuchaza uRiveiro ekhuluma nabeSABC Sport.
ICrystal Lake izamile ukufika ebhokisini leBucs ngesiwombe sesibili. URiveiro uthi basindele unozinti uSipho Chaine ngokungadedeli igoli.
“ICrystal Lake ibinethuba eliyingqayizivele. Bebegade ukusijuma uma kwenzeka singanaki. Kwenzekile salahla ibhola ezindaweni ezibucayi, okuyinto esidonsele ubungozi ngoba izitha zithole amathuba okusijuma.
Sibonga uSipho, bekufanele bashaye noma igoli elilodwa. Ngijabule ngoba siwinile, sishaye amagoli ayisithupha, sizoqhubekela phambili,” kubeka uRiveiro.