Umqeqeshi uPitso Mosimane usegonyuluke okokuqala ngemuva kokushaya i-Al Ahly.
Izindaba ngokushiya kukaMosimane ziqinisekiswe i-Al Ahly ngoMsombuluko, okuyizindaba ezithuse abathandi bebhola lase-Afrika.
UPitso uyena ocele ukukhululwa eqenjini ngemuva kokuxoxa nebhodi leqembu, uMengameli nekomidi.
UPitso usekhiphe isitatimende ngokuhamba kwakhe kwi-Al Ahly.
“As-Salaam-Alaikum. Ngibambe umhlangano noMengameli uMahmoud El-Khatib, ibhodi leqembu kanye nekomidi ezinsukwini ezedlule. Sinqume ukuthi ngikhululwe kwinkontileka yami.
Kubuhlungu ukudalula ukuthi ngiyashiya kwi-Al Ahly, nethimba lami elinoKabelo Rangoaga, Musi Matlaba noKyle Solomons lizoshiya kungekudala.
Uhambo kwethu luqale ngoSepthemba 2020, samukelwe ngobubele eqenjini, sifike sayizwa ingcindezi eqenjini, besibizelwe eCairo ukuzophothula umsebenzi obalulekile.
Besibekelwe umgomo wokunqoba iCAF Champions League, lokho sikwenzile. Siphinde sanqoba ne-Egypt Cup neqembu eliqinile.
Siqhubekele phambili kwiFIFA Club World Cup, sabuya nendondo yethusi. Siqede unyaka ka-2020 ngokunqoba iCAF Super Cup.
Isizini ka-2020/21 bekungeyokuqala sihleli kwi-Ahly. Siphinde sanqoba iCAF Champions League. UMengameli uMahmoud El Khatib nabalandeli basinikeza uthando njalo.
Silandele ngokuhlulwa kowamanqamu we-Egypt Cup ngoSepthemba 2021. Sinqobe iCAF Super Cup ngoDisemba 2021.
Unyaka omusha uqale sibambe imidlalo yeligi neChampions League. Sibuyela kwiFIFA Club World Cup, sabuya nendondo yethusi e-Abu Dhabi.
Sibhekene nobunzima kwiChampions League kodwa sifikile kowamanqamu. Yize sihlulekile ukunqoba kowamanqamu kodwa ukwesekwa abalandeli bethu kusizile kakhulu. Bekungelokuqala ngqa ukuthi i-Al Ahly ifinyelele emdlalweni wamanqamu amasizini amathuba elandelana iholwa umqeqeshi onsundu ngokwebala. Siqophe umlando ezinyangeni ezingu-20 kuphela.
Ngiyabonga kakhulu kuBebo ngokungethemba nethimba lami laseNingizimu Afrika. Isineke sakhe, ubuholi nokuzehlisa kwenze umsebenzi wami walula. Ukuqeqesha iqembu elikhulu e-Afrika kube yiphuphi elikhulu kimi, ngiyolibonga njalo.
Ngiyabonga kwibhodi, abaphathi, abadlali ngokungethemba. Ngibonga abalandeli beqembu abangu-70 million abangeseke kunzima. Ninginyusele ukuzethemba, angikaze ngithandwe ngalendlela ezweni langaphandle.
Indlela enithanda ngayo ibhola ngiyoyikhumbula njalo. Shukran.
Ngiyabonga kakhulu, ngiyathemba sizophinde sihlangane futhi. Allahamdulilah, Shukran.