Umqeqeshi weNapoli, uLuciano Spalleti, uhlabe ukwehla kwezinga eqenjini lakhe bedliwa okukuqala kule sizini yeSerie A. INapoli ishaywe yi-Inter ngo 1-0 izolo ebusuku ngegoli elivalelwe wu-Edin Dzeko.
Besekudlule imidlalo ewu-15 iNapoli ingayazi induku, kodwa izolo i-Inter ikushintshile lokho yakhuphukela kunombolo 4 kwi-log. INapoli isahamba phambili ngamaphuzu amahlanu esicongweni, ilandelwa yi-AC Milan. NeJuventus eqale le sizini ngebatha isisondele phezulu njengoba isisele ngamaphuzu ayisikhombisa kwiNapoli.
Ekhuluma ngemuva komdlalo uSpalleti uthe bebengadlala kangcono.
“I-Inter yenze evame ukukwenza, ixine uStanislav Lobotka ngoHakan Calhanoglu, bekumele senze kangcono kuleyo ndawo ukuze amaphasi ethu ezofinyelela ngasebhokisini labo.
“Besingenza kangcono ngokwezinga ebesidlala ngalo, ibhola besingalinyakazisi ngokushesha njengenjwayo. Besingazitholi nezikhala zokudlala ngemuva kwabadlali be-Inter basesiswini. Kunabanye abadlali bethu abangadlalanga kahle namhlanje,” usho kanje.
INapoli izobhekana neSampdoria ngeSonto ngo-19:00, bese ilandela ngeJuventus ngoJanuary 13.