Umqeqeshi weMamelodi Sundowns, uManqoba Mngqithi, uthi badliswe yigoli lokuqala akholwa ukuthi bekungamele liphasiswe ngoba ibhola bese liphumile emdlalweni wabo ne-Orlando Pirates. ISundowns igcine idliwe ngo 3-0 kulo mdlało ngamagoli amabili avalelwe wuMonnapule Saleng nelikaKermit Erasmus.
“Sidlale ngendlela ebesifun ukudlala ngayo. Kube yibhadi nje ukuthi singenelwe yigoli umdlalo usanda kuqala ngoba ngikholwa ukuthi bese liphumile ibhola ngesikhathi uSaleng eligoba. Ukukora kwabo zisuka kubenzele umdlalo waba lula ngoba iPirates ihlasela ngokuzuma,” kuchaza uMnqgithi.
“Kumele sizibuke kodwa nathi, silahle amabhola amaningi. Bekungamele sikuvumele lokho ngoba besidinga ukugcina ibhola, sibekezele, sizame ukubavula ngoba bese bevale emuva.”
UMngqithi uqhube wathi noma bewatholile amathuba kulo mdlało bahlulekile ukuwasebenzisa, iPirates yasebenzisa cishe onke amathuba ewatholile.
Okunye akhale ngakho uMngqithi ukungabibikho komgadli uPeter Shalulile obasizayo ngokuvalela amathuba, ngokunjalo nokubasazi ngokucindeza amaqembu abasuke bebhekene nabo.
“Besazi ukuthi uma singawathathi amathuba, kuzogcina sekuvela ukuthi siyamdinga uShalulile, njengoba kwenzekile namhlanje (izolo).”
Lo mqeqeshi uqhube wasola unompempe ngokuhluleka ukuphatha umdlalo ngendlela ebala ukuthi bekumele okungenani uSiyabonga Mpontshane athole ikhadi eliphuzi ngokumosha isikhathi kulo mdlało. Ubuze nokuthi kungani engalitholanga ikhadi eliphuzi u-Erasmus ngokukhumula umjezi ngesikhathi eqeda ukuvalela igoli.
“Kumele siyikhulume indaba yonompempe ngoba abekho ezingeni elifanele, lento sengike ngayisho kweminye imdlalo futhi angikhulumi ngeyethu kuphela. Nakwimdlalo yaMaZulu muva nje kade sibuka…”