Umqeqeshi weRoyal AM uJohn Maduka uthi bekufanele alinikezwe ithuba lokuqalisa esikimini uSihlalo weqembu uAndile Mpisane emdlalweni weDSTV Premiership bebhekene nomkhaya AmaZulu.
IRoyal AM inenebulwe ngo 3-0 kulomdlalo, okube amagoli angene elandelana esiwombeni sokuqala.
U-Augustine Kwem uvalele enethini amagoli amabili, elinye lashaywa uMlondi Mbanjwa.
UMpisane ukhishwe ekuqaleni kwesiwombe sesibili, indawo yakhe yavalwa uSibusiso Magaqa.
UMpisane ubephucwa ibhola kalula esiwombeni sokuqala, nabadlali boSuthu bezicanasela uma bebhekene naye.
“USihlalo uthole ithuba lokudlala okokuqala ngqa. Kunzima ukuqinisekisa ukuthi uzosithola isikimu. Bekukhona ithuba lokumqalisa emidlalweni edlule, bekufanele alinikezwe ithuba lokudlala,” kuchaza uMaduka ekhuluma nabezindaba.
UMaduka useke waveza ukuthi uMpisane uyazimisela ejimini yize ebukeka enomzimba omkhulu.
Yize iThwihli Thwahla ibuye ngamandla esiwombeni sesibili, uMaduka uthi bekuphoqa ukwenza izinguquko ngenhloso yokubuya emdlalweni.
UMaduka uthi akaliboni iphutha ekuqaliseni uMpisane emdlalweni.
“Izinguquko esizenzile azishintshanga indlela ebesidlala ngayo. Siqhubekile nebhola esilijwayele. Abadlali esibafakile bajwayele ukudlala, yingakho siqhube umgqigqo omuhle. Ngiyaphika ukuthi ngiqoke isikimu esingaqinile.
Amagoli esiwadedelile angene ngenxa yamaphutha esiwenzile. Amaqembu ayajezisana uma uzokwenza amaphutha,” kubeka uMaduka.
IRoyal AM inikeza abadlali abasebancane ngokweminyaka ithuba ngenxa yesigwebo seFIFA esinqaba ukuthi isayinise abadlali.