Umgadli we-Orlando Pirates uZakhele Lepasa usegonyuluke ngengcindezi ababhekene nayo yokushaya amagoli njengoba iqembu lishaya udaka phambi kwamapali.
ULepasa ushaye amagoli amabili emdlalweni weligi beshaya iTS Galaxy ngempelasonto.
Bekuqala ngqa ukuthi iBucs ishaye amagoli amabili emdlalweni owodwa kulesizini.
“Besingaphansi kwengcindezi yokushaya amagoli, besigeja inqwaba yamathuba. Kwesinye isikhathi, akukhathalekile ukuthi siwashaya kanjani amagoli. Okubalulekile ukuthi siwine. Ukunqoba kwiGalaxy kuyakhombisa ukuthi sizowina uma sishaya amagoli,” kubeka uLepasa ecashunwa abeSuperSport TV.
IBucs isihleli endaweni yesibili ngemuva kweMamelodi Sundowns ehleli esicongweni.
“Bekubalulekile ukuwina ukuze sizobuyisa isithunzi seqembu, sikwazi nokuhubha izinhloso zethu kulesizini,” kubeka uLepasa.