Umqeqeshi weBafana Bafana uHugo Broos usephonsele u-Evidence Makgopa inselelo yokulwela ijezi kwi-Orlando Pirates uma ezimisele ngokubuya esikwatini seqembu lesizwe.
UMakgopa akabizwanga esikwatini esiwujuqu esizodlala ne-Uganda neSouth Sudan emidlalweni yokuhlungela i-AFCON ezobanjelwa eMorocco ngoDisemba ngonyaka ozayo.
Lomgadli wayebiziwe esikwatini sabadlali abangu-38 kodwa ujoyine uPercy Tau, Simon Van Duivenbooden, Thapelo Maseko noMihlali Mayambela kubagadli abashiywe ngaphandle sekuqinisekiswa abazomela izwe.
UBroos uqoke ukubuza uLyle Foster no-Iqraam Rayners abazitamuzelayo isikimu emaqenjini abo.
UMakgopa unegoli elilodwa emidlalweni emihlanu ehlanganisa umqhudelwano weMTN8 neCAF Champions League.
“Bengifake abagadli abane esikwatini sabadlali abangu-38. UMakgopa, Iqraam Rayners, Lyle Foster nomunye umgadli ozinze eHolland uVan Duivenbooden, ngiphoqelekile ukuthi ngithathe isinqumo.
“Kukhona uRayners owenze kahle emidlalweni edlule neBafana Bafana. ULyle Foster uyazitamuzela isikimu kwiBurnley. UMakgopa akadlaliswa kwiPirates, izinto sezishintshile manje. Yingakho uMakgopa engabizwanga esikwatini,” kuchaza uBroos ekhuluma kuSABC 1.
UMakgopa wayidlala yonke imidlalo eyisikhombisa iBafana ibuya nendondo yethusi kwi-AFCON eyayibanjelwe e-Ibory Coast ngonyaka odlule.
UBroos ucela bafike ngobuningi abalandeli beqembu lesizwe uma selibhekene ne-Uganda e-Orlando Stadium ngoLwesihlanu.
Lomqeqeshi uthi wahlabeka umxhwele ngendlela abalandeli baseBloemfontein abagqisha ngayo eFree State Stadium bezobukela iBafana itholene neZimbabwe kowokuhlungela iNdebe yoMhlaba ngoJuni.
“Kufanele bagcwale inkundla abalandeli njengoba kwenzeka eBloemfontein. Ukubongelwa abalandeli abaningi kwasiza kakhulu ngesikhathi sithwele kanzima emdlalweni.
“Sanyusa umgqigqo esiwombeni sesibili siphushwa abalandeli. Ngiyathemba nabalandeli abazotheleka e-Orlando Stadium ngoLwesihlanu bazolifakela umfutho iqembu. Iqembu liyabadinga abalandeli, ikakhulukazi uma izinto zingasahambi kahle enkundleni,” kusho uBroos.
IBafana izovakashela iSouth Sudan emdlalweni wesibili ozobanjelwa eJuba Stadium.