Umdlali weStellenbosch FC uFawaaz Basadien uthi uzoqhubeka nokuzimisela kuleliqembu yize iqina njalo imibiko emkhomba kwiKaizer Chiefs.
UBasadien (27) uyiqale ngenothi eliphezulu isizini ka-2024/25 njengoba esebhakuzise inethi kathathu emidlalweni emihlanu.
Lomdlali, oyibamba emuva kwesokunxele, uzidonsele amehlo ezinkunzi zaseSoweto iKaizer Chiefs ne-Orlando Pirates ngokushaya into ecokeme ngesizini ka-2023/24 ephele engomunye wabadlali ababalulekile kwiStellies.
Ngokwemibiko yabezindaba, uBasadien wagcina esezicelela ukudedelwa kubaphathi beStellies ukuze ezosayina neChiefs eyayimhleli ezithendeni. IGlamour Boys isezinhlelweni zokusayinisa uBradley Cross weGolden Arrows odlala indawo efanayo noBasadien.
UBasadien uthi umqondo wakhe uwugxilise kwiStellies, okubhalwa abezindaba angeke akunake.
“Ngibhekana nezinto engizlkwazi ukumelana nazo. Nginenkontileka neStellenbosch, okuyiqembu engilidlalelayo. Kufanele ngiqhubeke nokuzimisela kwiStellenbosch, umsebenzi wami ukuzikhandla ensimini, angeke ngikunake okubhalwe abezindaba,” kubeka uBasadien ekhuluma esithangamini nabezindaba eDobsonville Stadium ngoMsombuluko.
“Ngiyajabula ngokumataniswa neqembu elifana neChiefs. Nginenkontileka neStellenbosch okufanele ngiyihloniphe. Ngizimisele ngokuzikhandla kulesizini,” kuchaza lomdlali.
UBasadien ukufanise nokufezeka kwephupho ukubizwa esikwatini seBafana Bafana esizobhekana ne-Uganda neSouth Sudan kweyokuhlungela i-AFCON yango-2025.
“Kuyisibusiso esikhulu ukudlalela izwe lami. Bonke abadlali bayafisa ukumela amazwe abazalelwe kuwo, nginikezwe ithuba ngoba ngizimiselile eqenjini lami. Kufanele ngilisebenzise lelithuba engilinikiwe,” kubeka uBasadien.
IBafana izobhekana ne-Uganda ngoLwesihlanu. Izovala neSouth Sudan ngomhlaka 10 kuSepthemba eJuba Stadium.