ULieutenant-Colonel Chris Mangena, onguchwepheshe ekuhlolweni kwezibhamu nezinhlamvu ezimataniswa nokubulala, uthi igobolondo elatholakala kumsolwa wesithathu, uMthobisi Mncube, laphuma kwisibhamu okwadutshulwa ngaso owayengunozinti we-Orlando Pirates neBafana Bafana uSenzo Meyiwa.
UMangena ubefakaza eNkantolo eNkulu yaseGauteng ngoLwesine.
UMangena wahlola indawo yesigameko ngomhlaka 27 ku-Okthoba 2014, ngosuku lwangakusasa kubulawe uMeyiwa owayevakashele isinqandamathe sakhe uKelly Khumalo eVosloorus, Ekurhuleni.
Lofakazi woMbuso watshela iNkantolo ngaphambilini ukuthi wabona izindawo ezimbili ekhishini ezadubuleka. Kwakunenhlamvu eyashaya umnyango neyashaya phansi.
Ngokwemiphumela yokuhlolwa kwesibhamu nezinhlamvu, amagobolondo atholakala endaweni yesigameko aphuma esibhamini i-9mm Parabellum, okusolwa ukuthi ngesikammangalelwa wesithathu.
Isibhamu sathathwa kumsolwa ngesikhathi eboshelwa elinye icala ngonyaka ka-2015.
NgoLwesine, uMangena utshele iNkantolo ukuthi udubule amahlandla angu-8 ngesibhamu sikaMncube ngesikhathi eqhubeka nokuhlola isibhamu nezinhlamvu.
UMangena uthi udlulisele umphumela kozakwakhe abane abavumelena naye ngakutholile.
“Angikhumbuli ngigejana nozakwethu ngemiphumela yokuhlolwa kwezibhamu nezinhlamvu ezimataniswa nobugebengu.
“Bengihlalelwe uhlu lwamacala angu-16 abelinde ukuthi ngiwaqhathanise nenhlamvu esetshenzisiwe. Lamacala ahlolwe omunye uchwepheshe obuyise imiphumela eveza ukuthi lenhlamvu ayiqondene nalamacala angu-16.
Ummeli wabasolwa uSipho Ramosepele umphikisile uchwepheshe, waveza ukuthi imiphumela yakhe isengaphoselwa inselelo.
UMangena ubeke kanje ephendula imibuzo kaCharles Mnisi, ongummeli kamsolwa wesithathu uMncube.
“Ngibuyelwa okuningi okufanayo ngamagobolondo nenhlamvu yesibhamu. Igobolondo lidala impela kodwa ngilihlolile ngabuya nomphumela. Kukhona imidwebo eyaqinisa izinsolo zami, yayivela kaningi kwisibhamu. Umbiko wami wagqugquzelwa ukusondelana kobufakazi. Bekunzima ukuqinisekisa kodwa ngangibona ukuthi amagobolondo aphuma kuso isibhamu,” kubeka uMangena.