Umqeqeshi weReal Madrid uCarlo Ancelotti ubona uJude Bellingham elingana nenkakha yeqembu uZinedine Zidane ngokwezinga.
U-Ancelotti ubencoma uBellingham oqokwe njengomdlali ovelele kowe-UEFA Champions League bexebula iNapoli SC ngo 4-2 eSantiago Bernabeu izolo.
UBellingham ungqofele enethini igoli elilodwa, wakhandela uzakwabo uJoselu igoli eliqede umdlalo esikhathini sikanompempe.
“Kunzima ukuqhathanisa abadlali abagijime ezikhathini ezahlukene. UBellingham uyakwazi ukungena ebhokisini ekubeni uZidane wayengakwenzi lokho. UZidane wayenethalente elihlukile ngebhola, okuyinto angenayo uBellingham.
Ibhola lesimanje lifuna abadlali abasebenzisa amandla njengaye uBellingham okwaziyo nokufukuza inkundla yonke,” kuchaza u-Ancelotti esekhuluma nabezindaba.
UBellingham useshaye amagoli angu-15 emidlalweni engu-16 kwiReal Madrid. Lomdlali usebhakuzise inethi kuyona yonke imidlalo yeChampions League kulesizini.
“Bekubukeka sengathi ukhathele esiwombeni sesibili. Kumthathe imizuzu engu-15 ukuthi angene egiyeni, asibuyise emdlalweni. Ngiyamangala ngendlela asheshe wajwayela ngayo eqenjini.
Uyasimangaza njalo. UBellingham uyisipho ebholeni likanobhutshuzwayo. Siyamjabulela ngendlela asejwayele ngayo eqenjini.
UBellingham usemncane futhi uzimisele ngebhola. Bayamhlonipha ozakwakhe, sekusele khona afunde ulimi lwaseSpain,” kuchaza u-Ancelotti.
IMadrid idlulele kwi-last 16 yeChampions League iqhwakele kuGroup C.
ILos Blancos, elinyalelwe abadlali abangu-8, izobhekana neGranada kwiLaLiga ngoMgqibelo.