Kwezithinta ukudayiswa nokuthengwa kwabadlali namuhla siqala ngodaba luka-Alexis Mac Allister okuvela ukuthi usohlwini lwabadlali abafunwa yiLiverpool. UMac Allister odlalela iBrighton & Hove unqobe iWorld Cup ne-Argentina kanti nakwiPremier League uyayishubisa kule sizini.
ILiverpool sekunesikhathi ithungatha umdlali ozovala isikhala esashiywa wuPhilipe Coutinho kunombolo 10. Izamile ngokusayinisa uFabio Carvalho kodwa kubukeka sengathi uzobolekiswa uma kuphela isizini.
Awase-Italy azimisele ngoMartial
Kuvela ukuthi i-AC Milan neJuventus bazimisele ngokusayinisa umgadli olimala njalo weManchester United u-Antony Martial. Lo mgadli usanda kubuya ekulimaleni, unamagoli amane emidlalweni ewu-15 kwiPremier League kule sizini.
IJuventus izimisele ngokudayisa umgadli esanda kumthenga, uDusan Vlahovic ngenxa yenkinga yezimali ebhekene nayo. Uma imdayisa kuzomele ithungathe umgadli ozovala isikhala sakhe.
Kwi-AC Milan ngakolunye uhlangothi nakhona kudingeka omunye umgadli njengoba bethembele ku-Olivier Giroud oseneminyaka ewu-36. Omunye umgadli emphethe wuZlatan Ibrahimovic oneminyaka ewu-41.
IMilan izamile ukulungisa inkinga yokuhlasela ngamakhehla isayinisa uDivock Origi (28) kodwa uphikwa yizinto njengoba esashaye amagoli amabili emdlalweni ewu-24.
Usebukwa amaqembu amakhulu uWatkins we-Aston Villa
Sekuvela neBayern Munich kumaqembu agaqele umgadli we-Aston Villa ovutha engabaselwe kulezi nsuku u-Ollie Watkins.
Kuvela ukuthi uThomas Tuchel uzimisele ngokusayinisa lo mgadli njengoba iBayern ishoda ngabagadli. UWatkins usevalele amagoli awu-14 emdlalweni ewu33 kule sizini.
Phambili lo mdlali uke waphumela obala ngesifiso sokudlalela i-Arsenal, kodwa lokho kubukeka sekuwumlando njengoba engabalwa kubadlali abafunwa wuMikel Arteta.