Umqeqeshi we-AS Maniema Union uPapi Kimoto uthi azobuya elambatha eLoftus Versfeld amaqembu aseMorocco i-AS FAR neRaja Casablanca asahlalelwe ukuzobhekana neMamelodi Sundowns kweyamaqoqo yeCAF Champions League.
IManiema, ekleliswe ezansi kulomqhudelwano uma iqhathaniswa namanye amaqembu, imangaze abaningi ibuya nephuzu elilodwa ivula neDowns ngoLwesibili ebusuku.
UKimoto ulijabulele iphuzu, waveza ukuthi lomphumela ubanikeze nophawini wokuqeda esicongweni kuleliqoqo.
“Ngijabule ngephuzu esibuye nalo, abadlali bafele enkundleni, babambana noma sekunzima. Sinethuba lokuqeda esicongweni kuleliqoqo uma singayinqoba yomibili imidlalo esekhaya elandelayo.
“Asithukile nakancane, sidlala ngaphandle kwengcindezi. Abadlali bafake umfutho wokugcina namuhla. Siyiqembu elithathwa kancane, asinayo ingcindezi,” kubeka uKimoto ekhuluma esithangamini nabezindaba.
UKimoto uphumele obala, waveza ukuthi iDowns iyona ebhekiwe ukuba iqede ihleli esicongweni kuGroup B.
“ISundowns iyiqembu elisezingeni eliphezulu, badlala ibhola elihle. Ngibona besethubeni lokuqhwakela ngokunethezeka esicongweni.
“Angikholwa ukuthi lamanye amaqembu amabili (Raja ne-ASFAR azokwazi ukubuya nephuzu elilodwa eLoftus. Siyishubiselile iDowns, bekufanele sithole noma igoli elilodwa. Sijabule ngephuzu elilodwa kodwa iSundowns iyizimfivilithi kuleliqoqo,” kusho uKimoto.
I-Union izobhekana neRaja emdlalweni wesibili wamaqoqo ozobanjelwa Stade des Martyrs, eKinshasa, ngomhlaka 7 kuNovemba.