Umqeqeshi weMamelodi Sundowns uRulani Mokwena uthe kuyisifiso sakhe ukubona inkundla iMoses Mabhida igcwele abalandeli be-Orlando Pirates abazobhekana nayo kowamanqamu weMTN 8 ngoMgqibelo.
IDowns izobe ibheke ukubuyisa izinduku kwiBucs eyabashaya kabuhlungu kulomqhudelwano ngesizini ephelile. IBucs yanqoba ngo 3-0 kowandulela owamanqamu.
URulani ubuzwe ngomthelela kumphumela womdlalo uma inkundla igcwele abalandeli bePirates.
“Nginempendulo eqondene nombuzo wakho. Okubi nje ukuthi nizoshintsha amagama, okuyinto ejwayelekile kwabezindaba.
Angifuni ukubeka izaba. Ngiyathemba inkundla izogcwala abalandeli bePirates ngoba ngiyakwazi okuzokwenzeka. Ngibuya kuyo iPirates, ngiyakwazi okuzokwenzeka.
Ngifisa kugcwale abalandeli bePirates kwizethameli. Sidlale kahle sihambele eWydad naseBelouizdad. Abalandeli babebanga umsindo, i-Al Ahly yashunqisa izinto, izama ukusidlalisa kanzima.
Iqembu lidlala kangcono kulezo zimo, ngisho sihambele e-Orlando Stadium, bazama okusemandleni ukusididisa. Lokho angeke kusiphazamise ezinhlelweni esinazo,” kubeka uMokwena obekhuluma nabezindaba eChloorkop.
ISundowns izobhekana nePirates namhlanje eMoses Mabhida ngo-6.