Izolo kugcine kuqinisekisiwe ukuthi i-Orlando Pirates isifake isikhalo kwiCAF ngezinto ezintathu ezithinta umdlalo wayo neSt Eloi Lupopo.
Kuzokhumbuleka ukuthi iLupopo ivithize iPirates ngo 3-0 emlenzeni wokuqala eDR Congo, iBucs yabuyisa izinduku Esigodini, kodwa yagcina ishaywe kuma-penalty emlenzeni wesibili.
IPirates ikhalaza ngezinto ezintathu kwiCAF ngethemba lokuthi uma iLupopo itholwa isephutheni kuzoshintsha umphumela womdlalo, kudlale Ezimnyama esigabeni samaqoqo kwiCAF Champions League (CAFCL). Sihlaziya izinto ezintathu iBucs ekhala ngazo.
Umqeqeshi uGuy Bukasa
IPirates ithi umqeqeshi weLupopo uGuy Bukasa kwakungafanele abe sebhentshini labaqeqeshi ngenxa yokumiswa yiCAF (suspension) imidlalo eyisithupha okuyisijeziso asithole ngemuva komdlalo we-DR Congo U20, neSouth Africa U20 ngo-22 September 2025.
NgokweLupopo isijeziso seCAF sithinta u-U20 kuphela, asihlangene neminye imiqhudelwano yeCAF. IPirates ayihambisani nalowo mbono.
Imithetho yeCAF ithi uma umqeqeshi emisiwe, umisiwe kuyona yonke imiqhudelwano yeCAF, kodwa kuvela ukuthi iSt-Eloi Lupopo yayibhalela iCAF ngalolu daba icela ukucaciselwa ngaphambi kokudlala iround yokuqala yemidlalo yokuhlungela iCAF Champions League. Kubikwa ukuthi kwathiwa engaba khona ebhentshini uBukasa, nangempela yalandela lowo myalelo.
KoweBucs yiCAF ezocacisa ngoba wavela nombiko wokuthi uBukasa wangena enkundleni enganayo i-accreditation, esingazi yaphelelaphi indaba yayo njengoba agcina evunyelwe ukungena e-Orlando.
Umdlali uHenoc Molia
Kubikwa ukuthi iBucs iphinde yakhalaza ngomdlali weLupopo uHenoc Molia, ithi akabhaliswanga ngesikhathi. Amaqembu adlala kwimiqhudelwano yeCAF kufanele abhalise abadlali kwiCAF Management System (CMS), okuyinto ehamba ivalwe ngosuku olubekwe yiCAF.
IPirates ithi lo mdlali wabhaliswa sesidlulile isikhathi. Kuzofanele Ezimnyama ziveze ubufakazi balokhu kwiCAF ukuze sibambeke lesi sikhalo.
Ngo-2021 i-AS Kigali yadlalisa umdlali owabhaliswa sesidlulile isikhathi, kwaphetha ngokuthi iCAF iphendule umphumela womdlalo wayo yadliwa ngo 2-0.
Ubufakazi bePirates buzoba wukhiye kulesi sikhalo, kodwa nayo iCAF izokwazi ukuzibhekela ukuthi kumi kanjani kwi-CMS.
Umdlali uRamos Kashala
Kuzokhumbuleka ukuthi uKashala wavalela igoli lokuqala leLupopo emlenzeni wokuqala. Ngokwesikhalo seBucs, uKashala unama-passport amabili.
Ngokocwaningo lwethu, iCAF izobheka ukuyiqinisekisa le ndaba ngokuxhumana nohulumeni waseDR Congo ukuqinisekisa ukuthi ngabe unama-passport amangaki, bese kubhekwa nasemabhukwini eFIFA ukuthi ngabe ubhaliswe kangaki. Uma kutholwa ukuthi unama-passport amabili naye uzothathwa njengomadlali odlale kungafanele, okungaholela ekutheni iCAF inikeze iBucs iwin.
Kuzokwenzekani manje?
ICAF ibhalele iSt Eloi Lupopo iyinikeza ithuba lokuthi iphendule kwesolwa ngakho. Kulindeleke ukuthi udaba luphothulwe ngokushesha njengoba ngoNovember 3 kuzoba ne-draw yeCAF Champions League neyeCAF Confederation Cup.
ILupopo ibisivele iqalile ukuphendula emaphephandabeni aseNorth Africa nasemisakazweni, iveza ukuthi azikho izinto iBucs ekhala ngazo, isizama upotsho wokungena nje. Ithi kungani iqembu ababhekana nalo kwiround yokuqala lingakhalanga ngalezi zinto.
Imidlalo yamaqoqo izoqala ngoNovember 21.