Ugcine ekhonjwe afika ngayo kwiLeicester City uBrendan Rodgers obesekunesikhathi ehleli ngesinqe esisodwa njengoba amaFoxes edonsa ngodizili kwiPremier League.
ILeicester ishaywe yiCrystal Palace ngo 2-1 ngoMgqibelo okuyehlisele kunombolo 19 kwilog. Emdlalweni eyisikhombisa edlule iLeicester isidliwe emdlalweni eyisithupha yadlala ngokulingana kowodwa.
Empeleni, ngasekuqaleni kwesizini baningi ababezitshela ukuthi Rodgers uzoxoshwa njengoba wayephikwa yimphumela, okuthuse abaningi njengoba iqembu lakhe belizama ukungena kweChampions League kumasizini amabili edlule.
ILeicester isanqobe imidlalo eyisikhombisa kwiPremier League emdlalweni ewu-28.
Ngokwemibiko evela e-UK namhlanje ekuseni, iLeicester izimisele ngokulanda uGraham Potter oxoshwe yiChelsea izolo kodwa kungenzeka imqashe uma sekuphele isizini.
URodgers ngakolunye uhlangothi kuvela ukuthi usengene ohlwini lwabaqeqeshi abafunwa yiTottenham Hotspur.