UMasipala weTheku usuqinisekise ukuvulwa kabusha kwehhotela elisenkabeni yedolobha iHilton osekuphele iminyaka emithathu livaliwe.
Lelihhotela elalidume ngobukhazikhazi nokusingatha imicimbi yomntakabani, lavalwa ngoJanuary 2021, kukhalwa ngemigomo ye-covid-19 nokuncipha kwezivakashi ezifihla amakhanda kulo.
IHilton yavulwa owayenguMengameli wakuleli uDr Nelson Mandela ngokusemthethweni ngo-1997.
Ukungasebenzi kwehhotela iminyaka emithathu kwabashiya bekhala emkhakheni wezokuvakasha.
NgoMsombuluko, uMeya weTheku uMnuz Cyril Xaba uqinisekise ukuvulwa kweminyango yalelihhotela okuqondane nokuqala kwenyanga yezokuVakasha uSepthemba. UXaba uthi ukuvulwa kweHilton kuzofukula umnotho wedolobha.
“Ukuvulwa kwehhotela angeke kugcine ngokuheha izivakashi ezihambele idolobha kodwa kuzokhanda namathuba omsebenzi,” kusho uXaba.
UXaba uthi ukusetshenziswa kwehhotela ekusingatheni imihlangano yezokuVakasha nezinkomfa ezibalulekile kuyingxenye yemizamo yoMkhandlu yokulungisa izinto maphakathi nedolobha.
UXaba uthi ukuzinza kwehhotela enkabeni yedolobha kuzolekelela uMkhandlu uma usufaka izicelo zokusingatha amanye amazwe kwizinkomfa eziseqophelweni eliphezulu.
“Ihhotela iHilton izoncela usizo kwi-Inkosi Albert Luthuli International Convention Centre (ICC) eyakhelwe eceleni kwayo. IDurban ICC izoheha inqwaba yabantu ngoba ingumakhelwane nendawo yokufihla ikhanda ezothakaselwa yizihambeli. Imizamo yokuheha abatshalizimali eThekwini isiqala ukuvuna izithelo,” kuchaza uXaba.
NgoJanuary nonyaka, iMenenja kaMasipala weTheku uMnuz Musa Mbheke watshela isigungu ukuthi basikaza ukuthatha ihhotela ngopotsho okwinkontileka yesivumelwano uma liqhubeka nokungasetshenziswa.