Umqeqeshi weKaizer Chiefs u-Arthur Zwane uthi iqembu bekufanele linqobe emdlalweni weligi neMarumo Gallants yize lihlulekile ukukhanda amathuba angoqekelele emdlalweni.
Umdlalo uphele zibambene ngo 1-1 eRoyal Bafokeng Stadium izolo emini, nakhona kusiza uZitha Kwinika oshaye igoli lokulinganisa ngomzuzu ka-83.
IGallants ihambe phambi ngegoli likaMahlatsi Makudubela esiwombeni sokuqala.
“Ngibona sengathi siphisane ngamaphuzu namuhla. Umdlalo bekufanele siwunqobe yize singadlalnga kahle. Siqale ngegiya elipohansi esiwombeni sokuqala.
Sikwazile ukubuya emdlalweni, sathola uqekelele wethuba ngoSekgota. Ngemuva kwalokho, besishaya udaka, siphasa ibhola kuphela.
Umdlali ugijime yedwa kubadlali abane bethu abavele bambukela. Akekho obefake ingcindezi ebholeni, bekunesikhala esikhulu. Akekho ofake ingcindezi, ibhola lashaya idolo kuZitha, laziyela kuMakudubela ozishayele igoli kalula. Yilowo kuphela umnyakazo owenziwe yiGallants emdlalweni.
Umdlalo bekufanele siwunqobe, besihlelile ukuthi sibayekele bagijime nebhola phambi kwethu, besilindele ukuthi bangasiqondi. Bathole ithuba elilodwa umdlalo wonke,” kubeka uZwane ekhuluma nabeSupersport TV.
“Likhona elinye ithuba abalitholile ebeliyingozi kodwa bekungafani. Lomdlalo uwodwa nje sifike ebhokisini izikhathi eziningi esiwombeni sesibili. Ngikhuluma ngoba bebengakatholi ngisho ikhadi elibomvu.
Sifike ebhokisini kodwa sathatha izinqumo ezingezinhle, okuyinto esijwayele ukuyilungisa ejimini.
Sihlulekile ukuthatha izinqumo ezifanele, sishaye igoli nge-freekick, okuyinto engijabulisayo ngoba sekunesikhathi eside singakwazi ukushaya amagoli ngalendlela. Ngiyathemba sizoqala ukushaya amagoli kumafreekick.
Sihlulekile ukuba yingozi ngaphandle kwegoli esilishayile,” kubeka lomqeqeshi.