Akalilahlile ithemba ngokuphakamisa isicoco se-AFCON ne-Egypt uMahmoud Trezeguet oveze ukuthi amathemba okunqoba lendebe usewabeke kwisipiliyoni sabadlali abaseqenjini.
UTrezeguet uqokwe njengomdlali ovelele ezakhe zibuya nephuzu elilodwa zibhekene neCape Verde ngoMsombuluko. I-Egypt idonse kanzima ibambana neCape Verde ngo 2-2 kwazise ilandele ngemuva izikhathi ezimbili emdlalweni.
Lomphumela ufake ezikaFaro kweyomkhumulajezi ilandela iCape Verde eqede iqhwakele esicongweni.
UTrezeguet ukholwa ukuthi iGibhithe iyizimfivilithi kulomqhudelwano.
“Ngineminyaka elishumi eqenjini lesizwe, akukho okungaphezulu kwalokho. Sifuna ukuqopha umlando ngokunqoba lendebe, konke sekusezandleni zikaMdali,” kuchaza uTrezeguet ekhuluma nabeCAF Online.
Lomdlali ubalule izinga labadlali nokuzinikela kwabo.
“Sizinikele ngokusemandleni ukuze sizodlulela esigabeni somkhumulajezi. Sekuzoqala isigaba esibalulekile.
Isipiliyoni sethu sizokwenza umehluko emidlalweni yomkhumulajezi. Sizofinyelela kowamanqamu uma evuma uMdali,” kuchaza uTrezeguet.
IGibhithe iyiqembu lokuqala elidlulele kweyomkhumulajezi ngaphandle kokunqoba nowodwa umdlalo esigabeni samaqoqo.
EzikaFaro ziqede yonke imidlalo zibambene ngo 2-2 zidlala neMozambique, Ghana neCape Verde.