Umqeqeshi weMamelodi Sundowns uRulani Mokwena utuse ikhefu le-AFCON ngokusiza abadlali abasha nalabo abeqiwa yijezi basheshe bajwayele isitayela sokudlala eqenjini.
URulani ubephawula ngemuva komdlalo weDSTV Premiership beshaya AmaZulu ngo 3-0 eLoftus Stadium izolo ebusuku.
Yize kuyiwe ekhefini zibambene, uLucas Ribeiro ubuye esethelwe ngezibonkolo washaya amagoli amathathu.
Lomphumela uvule igebe esicongweni seligi ngamaphuzu angu-12. IDowns ibisiqede imidlalo emithathu icosha iphuzu elilodwa ngaphandle kokubhakuzisa inethi.
“Ngibongela iMamelodi Sundowns, abalandeli ngokufika ngobuningi ngoLwesibili. Ngibongela nabadlali nethimba labaqeqeshi.
“Sidlale kahle esiwombeni sokuqala, besishoda ngegoli kuphela. Sikhande inqwaba yamathuba, besikwazi nokuqala ibhola emuva. Besivala izikhala eziyingozi enkundleni futhi singatatazeli uma siphethe ibhola.
“Ngiyajabula uma singatatazeli nebhola. Kufuneka ulithinte kaningana ibhola uma senisondele ebhokisini ngoba kumakwa umdlali ngayedwa. Sibuye noshintsho esiwombeni sesibili, besithola ibhola ezikhaleni ezincane, sifinyelela ebhokisini lezitha.
Besifaka ingcindezi ukuze sizokhanda amathuba, ngiyaziqhenya ngabadlali ngokuzinikela kwabo. Labadlali banendawo ekhethekile enhliziyweni yami. Ngiyalibongela iqembu ngokuwina,” kuchaza uRulani ekhuluma nabeSuperSport TV.
URulani uthi ikhefu le-AFCON limsizile wakwazi ukufundisa abanye abadlali ngesitayela esidingeka kwiSundowns.
“Sizamile ukubumbanisa iqembu ejimini. Kunezinto ezimbalwa esiqinisa kuzona eqenjini, lisizile ikhefu le-AFCON ngoba sithole ithuba lokucija uZuko (Mdunyelwa) Aubaas (Bathusi), Mbule (Sipho) noLebo (Maboe) nabanye abadlali abadinga ukwesekwa ukuze bezobuyelwa ukuzethemba.
“Kufanele bafunde ukuze bezozibona beyingxenye yeqembu. Sifana nomndeni eqenjini, sibumbene nabadlali bayazwana kakhulu. Kusekude kuphele isizini, abadlali basazonikezwa ithuba,” kuchaza uRulani.