Umqeqeshi weMamelodi Sundowns uRhulani Mokwena ufuna iqembu lakhe lingazithwali njengoba seliyizimfivilithi kwiCAF Champions League eqale ngempelasonto.
IDowns, equkule i-African Football League (AFL) kulenyanga, inenebule iNouadhibou ngo 3-0 emdlalweni weChampions League obuseLoftus Stadium ngeSonto.
Amagoli kaLucas Ribeiro, Peter Shalulile noGaston Sirino ahlalise iDowns esicongweni kuGroup A, ngaphezulu kwePyramids SC enqobe ngo 1-0 ibhekene neTP Mazembe.
URhulani uthi bazoqhubeka nokuzikhandla ngoba usemningi umsebenzi obahlalele.
“Kubalulekile ukugcina izinga esizibekele lona. Abantu babona umdlalo enkundleni, abazazi izinhlelo ngaphambi komdlalo. Kunezinga esizibekele lona ejimini.
Kungijabulisile ukubuya kwabadlali bonke. Ngixoxile ngokubuya kwabo ngoba babalulekile bonke. Sifike ezingeni esikulo ngenxa yokuqinisa ejimini. Angeke sehlise indlela esizinikela ngayo ejimini.
Okunye okubalulekile ukugcina isikwati esikuqondayo ukuzikhandla ejimini. Abadlali banobudlelwano obuhle, bayakwazi ukutakulana emidlalweni,” kuchaza uRhulani ekhuluma nabezindaba eLoftus.
URhulani ubalule isidingo sokuqhubeka nokuzikhandla, bakhohlwe isicoco seChampions League.
“Sizama ukuzibekela imigomo esizoyilandela ngokungayijahi. Sizonaka umdlalo ngamunye, singajahi ukucabanga ngezinto ezikude.
Ukuxhamazela kuyamosha ezikhathini eziningi. Okungijabuljsayo ukuthi abadlali esinabo bayakuqonda ukubaluleka komsebenzi wethu nemigomo esizibekele yona.
Kufuneka sikujuleke ukufika kowamanqamu, singagcini ngokucabanga,” kuchaza uMokwena ecashunwa.
IDowns inomdlalo onzima weligi njengoba izobhekana nomkhaya iSuperSport United eLucas Moripe Stadium ngoLwesithathu.