Umqeqeshi weBafana Bafana edlala kwiCHAN uHelman Mkhalele akalilahlile ithemba ngokuqhubekela phambili kulomqhudelwano yize bexebulwe yi-Angola ngo 2-0 ekuhambeni izolo.
“Ngiyaziqhenya ngabadlali ngendlela abazinikele ngayo, iningi labo likhuhla ibhentshi emaqenjini abadlali kuwona. Iningi labadlali belikhombisa ukukhathala sekuzophela umdlalo, njengoba besilwela ukuyishaya igoli.
Kuningi okuhle engikubonile ebholeni esilidlalile. Nginethemba lokuthi sizokwenza kangcono emdlalweni womlenze wesibili. Uma I-Angola ikwazile ukushaya amagoli amabili enkundleni yayo, nathi sizokwazi ukushaya amagoli azosinqobisa.
Sifuna ukuzibekisela indawo kulomqhudelwano ozobanjelwa e-Algeria,” kubeka uMkhalele.
Umdlalo womlenze wesibili uzobanjelwa e-Orlando Stadium ngeSonto. Umdlalo uzoqala ngehora lesithathu.