Umqeqeshi waMaZulu uPablo ‘Cijimpi’ Martin uthi ukuhlulwa yiStellenbosch FC kwiligi akubafakeli itwetwe njengoba sekusondele isemi-final yeCarling Knockout neTS Galaxy.
Usuthu beluqala ukuhlulwa ekhaya kule sizini.
UCijimpi uthe ayihlome ihlasele eMoses Mabhida Stadium ngeSonto njengoba kuyiwona mdlalo obaluleke kakhulu kule sizini.
“Kungiphoxile ukuphucwa amaphuzu ekhaya, okuyinto ebiqala ukwenzeka. Nginethemba lokuthi iqembu lizophaphama, lizicijele umdlalo owandulela owamanqamu ngeSonto.
“Lomdlalo ubaluleke ukuyidlula yonke esiyidlale kule sizini. Sikulungele ukuqopha umlando, sesizoqala izinhlelo zomdlalo olandelayo ngoba sifunde okuningi,” kubeka uCijimpi ekhuluma nabezindaba.