Kubukeka iphendleka indlela ebuyela kwiBafana Bafana kumdlali weMamelodi Sundowns uTerrence Mashego osebuyela ezingeni adume ngalo.
UMashego (27) wayeyisethenjwa kumqeqeshi weBafana Bafana uHugo Broos ngesikhathi engakaxinwa ukulimala esejoyine iMamelodi Sundowns.
UMashego wayesedlale emidlalweni emine yokuhlungela iNdebe yoMhlaba yango-2022 eyabanjelwa eQatar.
Ukulimala kuka-Aubrey Modiba kubuyisele uMashego esikimini kwiDowns njengoba eseqede imidlalo engu-15 kulesizini.
UMashego ushaye into ecokeme emdlalweni weCAF Champions League beguqisa iPyramids FC ngo 1-0 eCairo ngoLwesibili.
“Ngijabule ngoba bengiqeda umdlalo wesithathu ophelele. Ngizizwa sengibuyelwa ukuzethemba. Ngijabule ngefomu yami,” kuchaza uMashego ecashunwa yi-website yeqembu.
UMashego uthi kushipha ukotshi kuleliqoqo abafakwe kulo kwiChampions League. IDowns ihleli ngemuva kweTP Mazembe ngesizathu sokuhlulwa eLubumbashi. Amaqembu angemuva iPyramids neNouadibhou asele ngamaphuzu amathathu esicongweni.
“Sidlale ibhola elihle esiwombeni sokuqala ngoba besinendlela yokukhanda amathuba. Sithwale kanzima esiwombeni sesibili ngoba basifakele ingcindezi, sangakwazi ukudlala. Bekunzima ukuthola umgqigqo, namaphasi abengahlangani. Okubalulekile ukuthi sikwazile ukuthola amaphuzu amathathu ekuhambeni.
Linzima iqoqo esikulo ngoba wonke amaqembu ayinqobile imidlalo yasekhaya. Kudingeka sinqobe ekuhambeni ngoba sinomdlalo weTP Mazembe kuphela osekhaya. Leliqoqo liyinkinga,” kuchaza uMashego.
ISundowns izodlala neCape Town City emdlalweni weligi ozobanjelwa eDHL Stadium ngeSonto (15:30).