Ukapteni weCarling All Star u-Itumeleng Khune ubongele umqeqeshi uJose Riveiro ngokuhlanganisa iqembu eligcine likhale lamuka neCarling Cup ngoMgqibelo.
I-All Stars inqobe ngo 2-1 ibhekene neStellenbosch emdlaweni obushisa bhe esiwombeni sokuqala. UMfundo Vilakazi no-Ashley Du Preez, okungabadlali beKaizer Chiefs, bashayele i-All Stars amagoli esiwombeni sokuqala.
UMervin Boji ushaye eleStellies ngomzuzu ka-42.
Iningi beliyibukela phansi i-All Stars ebisebenzisa isikimu ebesivotelwe abalandeli bebhola bakuleli. I-All Stars iqale ngabadlali abahlanu abasuka kwiDSTV Diski Challenge. Umqeqeshi weStellenbosch uSteve Barker ubophele isikimu esiqinile.
UKhune ushaye into ecokeme kulomdlalo, wagcina ehlabene ngomklomelo womdlali ovelele ohambisana nesheke lika-R100,000.
Lonozinti uchome uRiveiro uphaphe legwalagwala ngomsebenzi awenze ne-All Stars ejime izinsuku ezimbalwa ihlanganyela ngaphambi komdlalo.
“Umphumela nokuzimisela kwabadlali kulibeka obala izinga likamqeqeshi. Usehlale amasizini amabili kulelizwe, wanqoba izicoco ezintathu.
Lokhu kuyakhombisa ukuthi usezingeni eliphezulu. Iqembu lakhe lambuyisa emazweni ngoba likholelwa kuyena. Abalandeli bamvotelile ngoba bekholelwa kuye. Uhlukile ngokwezinga umqeqeshi, uyazimisela futhi unomqondo wokunqoba.
Uhlanganise iqembu ezinsukwini ezimbili, wakwazi ukusicijela umdlalo. Abantu abaningi babone sengathi sizohlulwa. Ukushaya amagoli amabili ngokushesha kuwumsebenzi wabadlali nomqeqeshi. Kufanele sibongele lonke ithimba likamqeqeshi,” kubeka uKhune ecashunwa abeSuperSport TV.
URiveiro usephakamise izindebe ezine selokhu efike eNingizimu Afrika. Unqobe iMTN 8 izikhathi ezimbili kanye neNedbank Cup ehola i-Orlando Pirates.