Umqeqeshi weGolden Arrows uthi ukuguqiswa AmaZulu ngo 3-1 kwiDSTV Premiership kusezandleni zabadlali abahluleke ukuqeda ngomdlalo kusanethuba.
UKhenyeza ukholwa ukuthi ukushaya igoli lesibili bekuzowuqeda umdlalo kwazise ezakhe bezihamba phambili ngesikhathi kuyiwa ekhefini.
Usuthu lubhoke esiwombeni sesibili sekungene u-Augustine Kwem oshaye amagoli amathathu.
“Umdlalo ushintshwe iphutha elilodwa. Bekufanele sibajezise bengakalitholi nethuba lokushaya igoli lokulinganisa.
Umdlalo siwulahle ngamaphutha esiwenzile. Besingeke sibhekane nenkinga ukube sishaye igoli lesibili. Bekumele sishayele isipikili sokugcina,” kubeka uKhenyeza ekhuluma nabezindaba eMpumalanga Stadium.
Abafana Bes’thende bebehlulwa okwesithathu kulandelana. Banenebulwa Usuthu ngo 3-0 kwiCarling Knockout, kwalandela iRoyal AM ebashaye ngegoli elilodwa kwiligi emasontweni amabili adlule.