Umqeqeshi weLamontville Golden Arrows uMabhudi Khenyeza ubona ithuba lokuziphindiselela emdlalweni weNedbank Cup abazowudlala neTS Galaxy ngoLwesihlanu eSugar Ray Xulu Stadium.
Abafana Bes’thende babuya endukwini yayo iGalaxy ebashaye ngo 3-1 koweligi ngeSonto eMbombela Stadium.
UKhenyeza uthi iqembu lakhe lizimisele ngokwenza kangcono kwiNedbank yize iRockets isibathele ngesibhaxu.
“Ukubhekana nezingqinamba nezimo ezahlukene kuyangikhulisa. Sengifundile ngokubaluleka kokuhlala ethembeni njengomholi, ngibonga nokwesekwa yizikhulu zeqembu.
Indawo esihleli kuyo siyiqembu iyangifundisa. Izifundo engizozithola zizongicijela uhambo engizoluthatha njengomqeqeshi,” kuchaza uKhenyeza obekhuluma esithangamini sabezindaba ebesibanjelwe eMhlanga ngoLwesibili.
I-Arrows ayikaze inqobe emidlalweni eyisikhombisa eyedlule uma kuhlanganiswa yonke imiqhudelwano. Abafana bes’thende bagging ukunqoba ngo-Okthoba nyakenye, behlula iKaizer Chiefs ngo 2-1 koweligi owawubanjelwe eHammersdale Stadium.
“Yonke imidlalo ibalulekile, ngibala neyezinkomishi. Abadlali kufanele balwele ukuwinisa iqembu. Sizame okusemandleni ngeSonto kodwa kwangenzeka. Kufanele siziphindisele kulomdlalo weNedbank Cup,” kuchaza uKhenyeza.
IGalaxy eyagcine ingoshampeni beNedbank ngo-2019, yakhipha i-Arrows endleleni ebheke kowamanqamu. IGalaxy yayisadlala kwiMotsepe Foundation Championship ngalowo nyaka