Uphiko lwe-ANC Whip of Agriculture seluzwakalise ukungenami ngezenzo zikaNgqongqoshe wezoLimo uMnuz John Steenhuisen abamsola ngokuqasha abangani bakhe kuloMnyango.
Loluphiko luthi uSteenhuisen uphula umthetho wePublic Administration ngokugcwalisa izikhala ezivulekile kuloMnyango ngabantu abangazifundele lezikhala.
USteenhuisen uzidonsele amehlo eqasha inhloko yabasebenzi entsha kuloMnyango, waphinde waphakamisa amagama abantu azimisele ngokubaqasha ezikhaleni ezivulekile, okuyisenzo esicasule abe-ANC.
Lomholi weDemocratic Alliance ufake uRoman Cabanac esikhundleni sokuba yinhloko yabasebenzi eMnyangweni wezoLimo. UCabanac ungungoti kwezomthetho, aphinde abe yilungu leqembu lezepolitiki Capitalist Party of South Africa.
Ngokombiko weNews24, uSteenhuisen usebuya ehhovisini lePublic Service Administration eyocela imvume yokuvala izikhala ezintathu ngabantu abangazifundele.
“Isenzo sikaNgqongqoshe sokuqasha abantu abantula isipiliyoni neziqu ezifanele sikhombisa ubuphixiphixi. Yena neqembu lakhe bebekhalaza ngokuqashwa kwamaqabane, okuyinto ababeyibiza ngokuthi kuzanyelwa obhululu imisebenzi.
“Uyaqhubeka nokuzama ukubalekela umthetho wePublic Administration njengoba eseqashe abantu abathathu abagcina kamatikuletsheni ezikhundleni zikahulumeni eziphezulu futhi ezikhokhela kahle.
“Bawushaye indiva ngamabomu umthetho wePublic Administration ngoba befuna ukuzamela abangani imisebenzi, bayekele abantu abawufundele. Isenzo sabo siphambene nomthetho nesimilo sokusebenza,” kusho uSharon Davids onguMphathi we-ANC Whip for Agriculture.
Okhulumela iDA uKarabo Khakhau ungene ezintangeni ebuzwa ngezikhalazo ezibhekiswe eMnyangweni wezoLimo oholwa uSteenhuisen.
“Isinqumo sikaNgqongqoshe uSteenhuisen sokuqasha inhloko yabasebenzi siyilungelo lakhe. Sizoqhubeka nokuhlukanisa izindaba zoMbuso nezeqembu. Asinalo ikomidi lamaqabane alindele ukuqashwa noma yinini,” kuchaza uKhakhau.