Intatheli yezemidlalo
Umnikazi waMaZulu uSandile Zungu uthi abadayisi abadlali abashaya into ecokome kuleli qembu, oBonginkosi Ntuli, Siyethemba Sithebe noSiphesihle Maduna.
Kubikwa ukuthi uZungu uthenge uSuthu emndenini wakwaSokhela sekukhona imvume yokudayisa laba badlali. Kuzokhumbuleka ukuthi babambe iqhaza elikhulu besindisa AmaZulu ezembeni ngesizini edlule, kanti nakule sizini uSithebe noMaduna bayingxenye enkulu yezinhlelo zikamqeqeshi uBenni McCarthy. UNtuli ngakolunye uhlangothi ubanjezelwe ukulimala njengoba bekulindeleke ukithi aqhubeke abhakuzise inethi nakule sizini.
UZungu uthi usekulungise konke obekuyinkinga mayelana nalaba badlali, bazoqhubeka basebenze nomqeqeshi uMcCarthy.
Ecashunwa yiSoccer Laduma, uZungu ubeke kanje: “Bekumele badayiswe kumawindi amabili edlule kodwa leyondaba seyilungisiwe. Bangabadlali baMaZulu, izinkontileka zabo zisho njalo. USithebe noMaduna bayingxenye yeqembu, uyazibonela nawe. Okwamanje uNtuli usalimele,” kuchaza uZungu.Kuzokhumbuleka ukuthi AmaZulu ake aphumela obala athi ofuna uSithebe noNtuli kuzomele akhiphe uR25 million.