UMiguel Timm usacasha ngesithupha uma ebuzwa ngokusayina kwi-Orlando Pirates, okuyimfihlo eyaziwa ngisho ingane encane.
Inkontileka kaTimm neMarumo Gallants iyaphela ngomhlaka 30 Juni. Uqale ngo kukhonjwa kwiSekhukhune United nayo ebihudula izinyawo kwaze kwafika iPirates ebeke imali econsisayo kulomdlali.
Ebuzwa ngokuvuma ukuyodlalela iBucs ngesizini ezayo, uTimm akafunanga ukukhipha inkulumo eqondile.
“Okwamanje anginalo iqembu, angikalibangisi ngisho ekhaya. Kunzima selokhu sahlulwa kwiNedbank Cup. Ngisapholisa ikhanda nonkosikazi wami nendodakazi. Ngizokwazi ukuthatha isinqumo esiqondile uma sengibuye ekhaya,” kubeka uTimm obekhuluma noSkepe Matsebane wePower Sport Extra.
Lomdlali uyiphikile eyokusayina nePirates.
“Angiyona Intatheli ebhala lezindaba, angeke ngiphawule ngalokho. Angikaze ngikhulume kodwa ngiyawezwa amahebezi. Ngisahambile nomndeni wami, angifuni ukuphawula,” kusho uTimm.