Sphamandla Gumede
Isikhulu seTS Galaxy uTim Sukazi sichitha imibiko esisabalele ngokuzama ukuthenga isitifiketi seHighlands Park edlala kwiPremier Soccer League.
USukazi, ohola iGalaxy kuGlad Africa Championship, uthi useke wakhuluma nabaphathi beHighlands Park kwazise usaqhubeka nemizamo yokuthenga iqembu elidlala kuPSL. USukazi uthi akanayo imali eyanele yokuthenga leliqembu okubikwa ukuthi lidayisa ngo-R55 million.
“Angifuni ukuthenga iqembu, anginayo imali eningi ngaleyondlela. Kuzobonakala ekuqaleni kwesizini ezayo mayelana nezinhlelo enginazo zokuthenga iqembu. Uma iligi ibuyiswa kusasa, ngeke ngikwazi. Kodwa ngizozama ukuthenga iqembu uma iligi ibuyiswa ngoNovemba,” kuchaza uSukazi ecashunwa abePhakaathi.
Lesi sikhulu besifuna ukuthenga iBloemfontein Celtic enezinkinga zezimali. Ukudayiswa kweqembu kuphazanyiswe yizinhlelo zokugcina iqembu esifundazweni saseFree State, ekubeni uSukazi ubefuna iqembu liyozinza eMpumalanga.
“Ngiqale ngakhuluma nabaphathi beBidvest Wits, ngalandela ngeHighlands Park. Ngibe sengikhuluma neBloemfontein Celtic kodwa saphambana ngemibono.
NgoMgqibelo, uSihlalo weHighlands Park uLarry Brookstone utshele iziko labezindaba iTimesLive ukuthi kukhona umuntu ofuna ukuthenga iqembu.
“IHighlands Park ayidayisi kodwa kukhona umuntu osebeke imali etafuleni. Sizoyibheka kahle imali ebekiwe uma iconcisa amathe. Uma imali yanele, sizolidayisa iqembu. Uma umthengi engabeka lemali esiyifunayo, sizokhuluma ngokudayisa iqembu,” kusho uBrookstone.