Intatheli yezemidlalo 

Isikhulu seTS Galaxy uTim Sukazi uthi uselindele ukusebenzisa amava abadlali abangomakadebona uBevan Fransman noReneilwe Letsholonyane ngokubafaka kwithimba labaqeqeshi uma sebenqume ukuwabeka ethala amakhokho. 
Bobabili labadlali sebeqalile nezifundo zokuqeqesha yize besabonakala ensimini.

Ekhuluma nephephandaba iSowetan, uSukazi ubeke kanje:
“Konke kulele kubona, uma befuna ukuqeqesha, ithuba likhona ngoba sebeqalile nezifundo zokuqeqesha. Iqembu lizobanikeza ithuba ngokuhamba kwesikhathi. Sekunesikhathi baqala ukufunda, umnyango uvuliwe. Banolwazi lebhola, banesipiliyoni futhi,” kubeka uSukazi.

ULetsholonyane unemidlalo engu-11 kulesizini. U Fransman yena usedlale amahlandla angu-16, washaya amagoli amabili.

IGalaxy ihlele kunombolo 8 KWIDSTV Premiership. Konke kusahamba ngohlelo njengoba isiqoqe amaphuzu angu-26 emidlalweni engu-20.

Emdlalweni olandelayo izobhekana neBloemfontein Celtic eDr Petrus Molemela Stadium ngomhlaka 04 Ephreli.